140x140

Gummistivlar og stivlabuksur

Gummistivlar eru ikki altíð framleiddir úr gummi. Til dømis eru fleiri bíligir barnastivlar framleiddir úr bleytum PVC við ftalatum, ið kunnu vera skaðilig fyri umhvørvi og heilsu.  

 

Bleytt PVC kann innihalda ftalat

Gummistivlar kunnu vera úr gummi ella úr PVC. Gummi kann entin vera natúrgummi (latex) ella kunstgummi. Náturgummi er framleitt úr gummi frá gummiplantum, meðan kunstgummi er framleitt úr ráolju og gassi.
Stivlabuksur – ella waders - sum serliga vera brúktar til frítíðarfiskiskap, eru ofta framleiddar úr bleytum PVC.

Um tú vilt sleppa undan at dálka umhvørvið, so er best at keypa gummistivlar og stivlabuksur, ið ikki innihalda PVC og ftalat. Nógv sløg av stivlum eru til keyps, sum eru framleiddir úr tilfari, ið ikki hevur stórvegis árin á umhvørvið.

Gummistivlar úr náttúrugummi eru betri fyri umhvørvið enn formstoyptir PVC-stivlar. Men ofta kann vera trupult at vita, hvørjum tilfari stivlarnir eru úr - spyr teg tí fyri innan tú keypir.

 

Góð ráð um gummistivlar og stivlabuksur

  • Stivlar av náttúrugummi og vatntøttum toyi eru betri fyri umhvørvið enn formstoyptir stivlar, sum ofta eru framleiddir úr PVC.
  • Formstoyptir gummistivlar úr PVC eru eyðkendir við, at teir eru í einum, og uttan nakað festi  aftan.
  • Keyp ikki stivlabuksur úr PVC. Tær fáast eisini úr vatntøttum toyi og neopren gummi.
  • Vaska gummistivlar úr natúrgummi við brúnsápu - so halda teir longri!

Les meira um ftalat her

 

Svanurin og blóman

Umhvørvismerkini gera tað lætt og skjótt at finna umhvørvisvinarligar vørur klæði. Les meira um umhvørvismerkir her. Tá ein vøra er merkt við Blómuni ella Svananum, er tað trygd fyri:

  • At vøran er millum tær minst umhvørvistyngjandi av sínum slag,
  • At atlit eru tikin at tínari heilsu,
  • At góðskan er góð.

 Tíanverri eru enn ongir svana- ella blómumerktir gummistivlar á søluhyllunum.

 

Burturbeining

Stivlar, sum eru reinir og lítið brúktir, og sum onnur kunnu endurnýta, kunnu latast til endurnýtsluhandlar (t.d. Bláa Kross, Reyða Kross og Iktys) ella til loppumarknaðir. 

Gummistivlar og waders úr PVC plasti skulu ikki burturbeinast sum vanligt húsarhaldsburturkast, men skulu latast inn og tyrvast. Les meira um burturbeining av burturkasti.

 

Les hvat onnur skriva

 

Vit tú vita meira?
Um tú hevur spurningar um kemisk evni í vørum, so ring til Umhvørvisstovuna, tlf. 342400, ella skriva til okkara á us@us.fo

 

Gummistivlar